ኣብ ዕነ ህወሓት ዝተፈጠራ ውድባት ትግራይ ፦

ካብ መፈለምታኡ ተቓወምቲ ውድባት ክጣየሻን ክምስረታን ዝግብኧን ንዝሐሸ ፖለቲካዊ ምሕደራ ህዝበን ካብዘለወን ዝሐሸ መማረፂ ፖሊሲን ስትራቴጂን 'ምበር ንገዛኢ ውድብ ንምቅዋም ተባሂሉ ክኸውን ኣይነበሮን። ኣብ ዕነ ህወሓት ዝተፈጠራ ፖለቲካዊ ውድባት ትግራይ ፖለቲካ ዕጫኧን ኣብ ዒባ ካብዝፍጠሩ ዓጎሪያታት ዝተፈለየ ኣይክኾንን። እቲ ዒባ ከፍቲ ናብ ባይታ ነጢቡ ክሳብ ሃፊፉ ዝነቅፅ ኣብልዕሊኡ ብዝዓርፉዎ ናይ ዝተፈላለዩ ሃመማታት እንቋቑሖ ዓጎሪያታት ይፍልፈሉ 'ሞ ዕድመ 'ዞም ዓጎሪያታት ክሳብ እታ ዒባ ትነቅፅ ጥራሕ ይፀንሕ። እታ ዒባ ምስነቐፀት እቶም ዓጎሪያታት 'ውን ሓቢሮም ይጠፍኡ። ኣብ ዕነ [ሕምቀት] ህወሓት ዝተፈጠራ ፖለቲካዊ ውድባት ትግራይ ዕድመኧን ኣብ ሃለዋት ህወሓት ዝተሓፀረ ጥራሕ እዩ።

እዘን ውድባት ካብዚ ሓፁር ክወፃ እንተኾይነንን መቃለሲ ኣጀንዳኧን ዕነ ህወሓት ካብምዃን ክናገፋ እንተኾይነን ተቓውሞኧን ኣብ ውድብ ህወሓት ዘይኮነስ ኣብምስባኽን ኣብምስራፅን ዝሐሸን ንሰን ንህዝቢ ትግራይ ዝጠቅም ኣብዝብልኦ ናይ ፖለቲካን ናይ ፖሊሲን መማረፂታት እንተትነጥፋ ይምረፅ። ከም ውልቃዊ ትዕዝብተይ ውናት ኣብ ብሄራውን መንነታውን ክብሪታት ህዝቢ ትግራይ ኣድሂቡ ይሰርሕ ብምህላዉ ብተነፃፃሪ ኣብ ዝሐሸ ኣንፈትን ዕማምን ዘሎ ይመስል። መቃለሲ ፖለቲካዊ መስመሩ [Ideology] 2ተ ጫፍ ኮይኑ 'ምበር ውናት ፖለቲካዊ ስነልቦናን ክብሪታት ህዝቢ ትግራይን ኣብዝሐሸ ግምት ኣእትዩ ወሸን ኢሉ ዝቃለስ ዘሎ ይመስል።